Легендарниот фудбалер на Манчестер Јунајтед, Гери Невил го обвини Карлос Тевез за неговото непрофесионално однесување во втората сезона во дресот на „црвените ѓаволи“.
Карлос Тевез играше за Јунајтед од 2007 до 2009 година, освои два трофеи во Премиер лигата и еден во Лигата на шампионите, а потоа замина во Манчестер Сити.
– Она што ме нервираше кај Тевез е тоа што во втората сезона престана да се труди, почна да доцни на тренинзи и да се зафркава. Си играше со клубот и јас не можев да го издржам тоа, особено јас кој бев за Јунајтед, кој никогаш не помислував на друг клуб во мојот живот. Јас разбирам дека неговите околности се различни, но тој многу се водеше од мислењето на другите луѓе, оние околу него. Како професионалец, се чувствував разочаран што не се однесуваше на вистински начин, рече Гери Невил .
– За мене не е проблем што тој отиде да игра за Сити, никогаш не е проблем ако некој замине. Бекам си замина, Роналдо, Ван Нистелрој, сите големи играчи, но постои соодветен начин да го напуштите клубот и вистинскиот начин да се однесувате додека сте таму – истакна легендарниот фудбалер на Манчестер Јунајтед.
Сепак, сето тоа не влијаеше на мислењето на Невил за Карлос Тевез како играч.
– Да бидеме на јасно, заедно со Руни и Роналдо, тој го одземаше здивот со своите игри. Тоа трио беше спектакуларно, тие беа толку решителни, страшни на некој начин – Роналдо е малку поинаков, тој не ги малтретираше луѓето на теренот, тој само играше феноменално, додека Руни и Тевез беа неверојатно способни, но во исто време и улични борци – заклучи поранешниот дефанзивец на Англија.