Една од најчестите првични одлуки при започнување диета е да се откажете од јаглехидратите. Но, дали навистина треба да си го ускратуваме задоволството од тестенините за да ја подобриме исхраната? Новото истражување открива дека тестенините се подобри за вашето здравје отколку што мислите.
Тестенините не се само јаглехидрати – добрата вест ја пренесува „ScienceAlert“.
Една чаша (околу 145 грама) варени тестенини има околу 38 грама јаглени хидрати, 7,7 грама протеини и 0,6 грама масти. Покрај тоа, тука е целата вода што се апсорбира за време на готвењето, како и многу витамини и минерали.
Веројатно знаете дека постојат препораки за тоа колку енергија, односно калории треба да трошиме дневно. Овие препораки се засноваат на вашата висина и тежина, пол и физичка активност.
Но, можеби не сфаќате дека постојат препораки и за профилот на макронутриенти, односно видовите на храна кои ве снабдуваат со оваа енергија. И мастите и јаглехидратите се макронутриенти, исто како и протеините. Тие се разградуваат во телото за да произведат енергија за нашето тело.
Целта во нашата секојдневна исхрана би била да се осигураме дека добиваме доволно, но не премногу, од секое макро. Јадењето премногу или премалку од која било храна може да има здравствени последици.
Попрецизни податоци покажуваат дека 45-65 проценти од енергијата треба да ја добиваме од јаглехидрати, 10-30 проценти од протеини и 20-35 проценти од масти.
Односот на јаглени хидрати и протеини во тестенините е 38 грама до 7,7 грама, што е приближно сооднос 5:1, и тоа е во рамките на прифатливиот опсег на дистрибуција на макронутриенти. Сето ова значи дека тестенините всушност имаат доволно протеини во споредба со јаглехидратите. Можеме да добиеме толку многу протеини од тестенините благодарение на големиот удел од јајцата и пченицата.
Ако сте загрижени за нивото на калории и зголемување на телесната тежина, систематскиот преглед на 10 различни студии покажа дека тестенините се подобри за нивото на гликоза во крвта после оброкот отколку лебот или компирот.
Наместо да се откажете од шпагетите, размислете да ја намалите големината на порциите или да се префрлите на тестенини од интегрални житарки, кои се побогати со влакна, кои имаат корист за здравјето на цревата и можат да ви помогнат да се чувствувате подолго сити.
Тестенините без глутен имаат малку помалку протеини од тестенините од пченица. Значи, и покрај тоа што е поздраво за луѓето со нетолеранција на глутен, за повеќето од нас нема здравствени придобивки од префрлањето на тестенини без глутен.
Веста за вредноста на тестенините станува уште подобра кога се јадат ладни. Кога тестенините се варат и ќе се оладат, дел од јаглехидратите се претвораат во отпорен скроб. Овој скроб го добил своето име затоа што е отпорен на варење, па дава помалку енергија и е подобар за нивото на шеќер во крвта. Значи, вашите остатоци од тестенини, дури и ако ги подгреете, се пониски во калории од претходниот ден.