Државното обвинителство на Белорусија испрати барање до Литванија за екстрадиција на поранешната претседателска кандидатка, Светлана Тихановскаја.
Според изјавата на Обвинителството, барањето за екстрадиција на Светлана Тихановскаја е испратено за да може да биде гонета за нарушување на правниот поредок и јавната безбедност.
Претходно, Истражниот комитет на Белорусија иницираше екстрадиција на Тихановскаја, која сè уште е во Литванија.
Во врска со ова, од Вилнус дојде одговорот дека барањето на Минск е одбиено.
„Литванија не екстрадира луѓе кои се мета на политички прогон. Минск тоа добро го знае“, објави прес-службата на литванското Министерство за надворешни работи.
Да потсетиме, масовните протести на опозицијата во Белорусија започнаа на 9 август, по претседателските избори. Според Централната изборна комисија, актуелниот претседател Александар Лукашенко победи на изборите со 80,1 процент од гласовите. Опозицијата не ги призна резултатите од изборите и верува дека победи Светлана Тихановскаја.
Покрената е кривична постапка против Тихановскаја и членовите на координативниот совет на опозицијата, кој е формиран по нејзина иницијатива, меѓу другото, на тема заговор за преземање на власта и повик за создавање екстремистички формации.