Словенечкиот претседател Борут Пахор изјави дека Словенија не е во политичка криза и дека евентуалните предвремени избори што ги бара опозицијата ќе ја намалат можноста земјата да се докаже како успешна земја претседавач на Советот на ЕУ.
„Не сме во политичка криза затоа што функционираат сите институции“, рече Пахор во неделата за словенечката телевизија, наведувајќи дека поради нестабилното и несигурно владејачко мнозинство во парламентот, станува збор за „состојба на зголемена политичка неизвесност“, а не за политичка криза.
Говорејќи за критиките кон владата на Јанез Јанша во врска со наводната контрола врз медиумите и неименувањето на делегирани обвинители во Европското јавно обвинителство (ЕППО), Пахор рече дека сака да смета дека Владата може да ги реши овие проблеми со почетокот на претседателството со ЕУ на 1 јули, пренесува Хина.
„Доколку владата го загубеше мнозинството и изборите беа распишани на есен, тоа не би било добро во влошената политичка ситуација и изборите нема да решат ништо“, изјави Пахор.
Пред два дена во Брисел, по состанокот со европските лидери, Пахор рече дека до почетокот на словенечкото претседателство со ЕУ на 1 јули, владата во Љубљана треба да реши два проблеми поради кои неодамна беше критикувана од домашната и европската јавност. Ова е одбивање да се назначат двајца обвинители во новото Европско обвинителство и буџетско финансирање на словенечката новинска агенција СТА.
Министерката за правда на Словенија, Лилијана Козловиќ, поднесе оставка на крајот на мај, поради одлуката на Владата за поништување на постапката на словенечко назначување на двајца обвинители делегирани во ЕУ.
Словенечката опозиција со месеци бара смена на Владата, а во Љубљана редовна се одржуваат антивладини протести.