Петровска со документ ги демантираше лагите на Ковачки за уапсени македонски воени припадници во Косово

од Nikola Popovski

Првиот човек во ресорот одбрана, Славјанка Петровска со документ ги демантираше обвинувањата на пратеникот на ВМРО-ДПМНЕ, Драган Ковачки и најави судска разрешница за пласираните невистини за уапсени македонски воени припадници во Косово.

-Причината за вашиот бес и немоќ да се справите со тужбата е тоа што всушност ве натера да излезете на оваа говорница и тоа да го читате. Најновата ваша лага, дека припадници на военото разузнавање биле уапсени во Косово. Почитувана јавност, ќе погледнам горе, како што овој пратеник милува да гледа, ова е официјален допис од косовските авторитети, кои тврдат дека таков настан со македонски припадници на воено разузнавање немало. Немало! Еве го дописот. И за ова ќе се видиме на суд и ќе го прочитате, ќе го разгледате, ќе видите што ви е јасно, а што не ви е јасно, рече Петровска од собраниската говорница.

Таа додаде дека пратеникот Ковачки единствено се служи со дезинформации и ширење лаги.

-Почитуван пратеник, очекував од вас дека ќе зборувате за тоа што се случува во Армијата. Очекував дека ќе сакате да дознаете кои се плановите на Армијата и на Министерството за одбрана. Во изминатиот период покажавте дека единственото нешто кое ве интересира е сеење дезинформации и ширење лаги. На лагите одговарам со вистина и ништо повеќе. Јас стојам денеска исправена и одговарам за својата работа, а за тоа што вие ќе одговарате, набрзо ќе знае јавноста, рече Петровска.

Претходно Ковачки прочита детален извештај од психијатриско вештачење за министерката за одбрана, според кој таа мисловно и емоционално не се чувствувала добро.

-Според специјалистот-психијатар, во психичкиот статус на Министерот која сама доброволно се јавила и доброволно ги вршела психијатриските прегледи се констатира дека има оптеретен мисловен процес. Покрај оваа состојба на намалени когнитивни функции, на министерката и е препишана и седативна терапија, односно три месеци е под седативи, изјави Ковачки и додаде:

-Прашањето до премиерот дали мислите дека има потреба за итно разрешување на Министерот за одбрана која е со наведените манифестации на психичката состојба за која има писмен документ од психијатар? Дали ќе ја разрешите, праша пратеникот.

Слични содржини