По 8 години, исчистена патеката на кејот кај новиот пешачки мост

од Берта Китинска

Екипите на Град Скопје почнаа да го расчистуваат кејот на реката Вардар околу новиот пешачки мост кај зградата на Македонскиот народен театар.

-Овој дел од кејот скоро 8 години не беше прооден за пешаци и за велосипедисти поради градежните работи и натрупаниот градежен материјал поради изградбата на „Панорамското тркало“, велат од Град Скопје.

Оттаму додаваат дека изградбата на мостот е готова, а „Панорамско тркало“ нема, и сега се работи на конечно ослободување и на оваа делница од кејот, за да може граѓаните непречено да ја користат.

-Од овој потег досега се подигнати 27 кубни метри градежен материјал. Чистењето ќе продолжи и во наредните денови.Значајно е да се нагласи дека активностите на Град Скопје за чистење на кејот на реката Вардар продолжуваат и оваа година. Се расчистуваат и уредуваат пешачките патеки, се чистат калдрмата, каменот и коритото на реката.

Дополнително, се корнат гранки, треви и грмушки со кои се обраснати делови од кејот, се кастрат дрвјата, се уредува зеленилото и се чисти ѓубрето, велат од Град Скопје.

Слични содржини