Уредничките на весникот „Политика“, Сандра Гуцијан и Доротеа Чарниќ, биле усно известени дека ќе бидат прогласени за технолошки вишок, односно дека нивните работни места ќе бидат укинати со новата систематизација. Оваа одлука, според нив, има политичка позадина. Како што изјавија за Здружението на новинари на Србија (УНС), оваа информација ја добиле во редакцијата, без писмено известување.
На огласната табла на „Политика“ денес била објавена првата страница од одлуката за новата систематизација, со датум на усвојување од претходниот ден, но содржината не била достапна бидејќи огласната табла била заклучена. Според законот, мора да поминат осум дена од донесувањето и објавувањето на одлуката за таа да стапи на сила, што значи дека двете уреднички сè уште формално се вработени и одат на работа.
Гуцијан и Чарниќ сметаат дека отпуштањето не е последица на технолошки вишок, туку е политички мотивирано. Тие отворено ги поддржале студентските протести и, како што велат, со тоа станале „непожелни“ во редакцијата.
„Нашата поддршка за студентите веројатно беше причина да не сметаат за закана за дисциплината во редакцијата“, изјави Чарниќ за УНС. Таа работи во „Политика“ 24 години, а Гуцијан дури 31 година. Тие велат дека секогаш професионално ја вршеле својата работа, ги почитувале етичките стандарди и законите, добивале награди и признанија, и никогаш не сториле ништо што би можело да биде основа за отказ.
„Работиме под тешки услови, со малку новинари, често и прекувремено. Немаме ‘вишок’ луѓе. Ова е политичка одлука, не економска“, истакнаа уредничките.
Дополнително, велат дека добиле силна поддршка од своите колеги, но тие не зборуваат јавно поради страв од одмазда. Интересно е што веднаш по потпишувањето на иницијативата за укинување на нивните работни места, главниот уредник Марко Албуновиќ заминал на одмор, без да ги извести уредничките или да го информира одборот на директори. Уредничките најавуваат дека ќе покренат постапка за заштита на своите права.
„Ова е првпат во историјата на ‘Политика’ да има вакви отпуштања, без претходна најава, разговор или објаснување“, рече Гуцијан.
Слична ситуација неодамна се случи и во весникот „Новости“, кој исто така е во сопственост на Бобан Рајиќ. Новинарката Војислава Црњански Спасојевиќ беше отпуштена само еден ден по објавување фотографија од протест на својот Инстаграм профил. Таа претходно јавно го критикувала објавувањето на лични податоци на двајца студенти.
Иако и таа била добитничка на новинарски награди, во одлуката за нејзино отпуштање било наведено дека станува збор за „технолошки, економски и организациски причини“. Но, таа тврди дека никој од уредништвото не бил консултиран околу нејзината позиција. Според Законот за јавно информирање и медиуми, дискриминација на новинари и уредници поради политички ставови е строго забранета. УНС оцени дека овие отпуштања се обид за цензура и заплашување на новинари, што сериозно ја загрозува нивната слобода и улогата во општеството.