Жените кои се борат против украинските војници вчера учествувале во натпреварот за најубава жена-борец, заменувајќи ги чизмите и униформата со потпетици и свечени фустани.

Настанот го организирале самопрогласените власти во градот Доњецк во чест на Меѓународниот ден на жената, кој се уште се слави ширум поранешниот Советски сојуз.

Жените од три проруски баталјони се појавиле со свечени фустани, а потоа во униформа ги примале наградите и розите. Некои од нив некогаш работеле како учителки или имале приватни бизниси.

– Не сум навикната на ова. Мораме да носиме потпетици, а фустанот толку многу открива. Ние сме пред се војници, изјави Наталија, една од учесничките, чие воено име е „Радист“.