Весници во југоисточната американска држава Тексас објавија снимка од надзорните камери во основното училиште во мај во кое загинаа 19 деца и двајца учители.
На видеото објавена на веб-страницата на „Austin American-Statesman“ се гледа како 18-годишниот вооружен напаѓач Салвадор Рамос удира со својот камион пред основното училиште Роб на 24 мај и пука од неговата автоматска пушка во училиштето додека се слуша гласот на наставник, како им вика на учениците да влезат внатре во нивните училници, додека во тек е избезумен повик до операторот за итни случаи, јавува Гласот на Америка.
Потоа се гледа како Рамос влегува во училиштето и оди по ходниците додека не влегува во училница, по што следат звуци на истрели. Полицијата влегува во училиштето само неколку минути подоцна, а некои полицајци брзаат кон училницата пред да почнат да се повлекуваат додека се уште се слушаат истрели.
Повеќе полицајци влегуваат во училиштето, некои носат панцири. Но, монтираното видео покажува дека полицајците сè уште се собирале на крајот од ходникот цели 77 минути без да започнат спасувачки напори, дури и откако биле испукани повеќекратни истрели. Двајца американски маршали конечно упаднале во училницата и го застрелале Рамос за да стават крај на масакрот.
Неуспехот на полициските службеници веднаш да се соочат со Рамос, како и истрагата за пукањето, ги налути родителите и заедницата на Јувалде воопшто. Одделот за јавна безбедност на Тексас објави извештај претходно овој месец во кој се вели дека полицаец од Јувалде пропуштил можност да пука во Рамос пред да влезе во училиштето бидејќи чекал дозвола од началникот.