Пратеничката и потпретседателка на ЛДП, Моника Зајкова вечерва е хоспитализирана на Инфективната клиника во Скопје поради нарушување на здравствената состојба предизвикана од Ковид-19.
Во прилог ви го пренесуваме нејзиниот фб статус:
„Драги пријатели, почитувани граѓани,
Ви пишувам откако собрав малку сила, лежејќи на клиниката за инфективни болести каде што сум хоспитлизирана поради заразеност од Корона вирусот.
Најдирекно и најискрено сакам да ви пренесам дека вирусот е насекаде околу нас, не е воопшто за потценување, а заболувањето може да биде полошо отколку што можете да замислите!
Истовремено ве информирам дека не само јас, туку и моите родители, за среќа со полесни симптоми, се борат со фамозниот непријател кој и во нашата земја зеде голем замав.
Иако ги следевме и почитувавме сите протоколи, најверојатно некаде, за жал, сме потфрлиле.
Како се чувствувам?
– Телесната температура не ми спаѓа под 38.5 C, чувствувам омалаксаност, континуирано гадење, повраќање и изнемоштеност. Констатирано ми е почетна фаза на пневмонија.
Ова не сакам да звучи како заплашување, туку повеќе како отрезнување, затоа што понекогаш може да биде предоцна!
Од состојбата во која се наоѓам сакам најостро да ги осудам и да ги побијам неубеденоста во егзистирањето на вирусот, неверувањето кон неговата вируозност и негодувањето од пропишаните мерки.
Најдлабоко ве замолувам – Следете ги препораките од министерството за здравство и СЗО.
Надевајте се дека вирусот никогаш нема да допре до вас, но однесувајте се како да е насекаде околку вас, затоа што е реалност!
Носете маска, безусловно, макар и сами на улица! Одржувајте соодветна дистанца меѓу останатите! Одржувајте темелна дезинфекциона хигиена!
Пребродете го периодов кој бара одрекувања и изолација во нешто што е продуктивно за вас и за семејството.
Не посакувам ни минута да бидете каде што сум сега јас, затоа што чувството да се биде хоспитализиран не е ни малку пријатно.
Здравствените работници се беспрекорно организирани и посветени и заслужуваат највисоко признание, но глетката кон состојбата на пациентите е траорна и посакувам никој никогаш да не ја види или доживее!
За жал, борејќи се со опасниот вирус, извесен период ќе бидам спречена да ги извршувам работните обврски како пратеничка во републичкото собрание, претставувајќи ве најдобро што знам и умеам, но штом се изборам со овој предизвик, продолжувам со полна пареа!
Чувајте се!
А, до следно видување, срдечно ве поздравувам.
Ваша,
Моника Зајкова.