Повикај ги твоите градоначалници да ги зголемат платите на вработените, му порача Димовски на Мицкоски

од Nikola Popovski

Претседателот на Сојузот на синдикати на Македонија Дарко Димовски му се обратил на лидерот на ВМРО-ДПМНЕ, Христијан Мицкоски по повод обвинувањата дека е „омилен синдикалец на власта и дека не го поддржува“.

Димовски побарал од Мицкоски да ги повика градоначалниците на ВМРО-ДПМНЕ и директорите на јавните комунални претпријатија да им ги зголемат платите на вработените за 2.806 денари.

-Вака не се покажување дека си различен политичар, особено не со декларативни изјави дека поддржуваш декларативно зголемување на платите, а твоите политички поставени директори никаде не ги зголемиле истите и декларативно унапредуваш работнички права. Ваквите напади спрема синдикатите и работниците се ехо на еден режим и се директно спротивни на конвенциите на МОТ, па дали тоа значи директно мешање во работата на синдикатите за што, како што велите Вие, ќе мораме да ги информираме сите меѓународни организации и институции, напишал Димовски во писмото.

ВМРО-ДПМНЕ и Мицкоски веќе некое време го обвинуваат Димовски дека симулира социјален дијалог со Владата.

-Дарко Димовски со оглед на тоа што се пронајде во изјавата на лидерот на ВМРО-ДПМНЕ Мицкоски, добро е да објасни на целата јавност и пред се членовите на ССМ зошто ја троши својата енергија во политичка расправија со ВМРО-ДПМНЕ, наместо тоа да го прави со власта на СДСМ. И еве еден предлог до омилениот синдикалец кој има шанса да престане да се додворува на власта: нека напише предлог амандман со кој ќе се направи ребаланс и предвидат повеќе пари за повисоки плати, а пратениците на ВМРО-ДПМНЕ веднаш ќе го поднесат и поддржат, стои во последното партиско соопштение од најголемата опозициска партија.

Слични содржини