Познато на што посочуваат првичните извештаи од експлозијата во Бејрут

Првиот човек на либанската безбедносна служба, генерал Абас Ибрахим, на местото на експлозијата ја демантираше верзијата за детонацијата на пиротехника и изјави дека станува збор за други експлозивни направи што биле складирани долго време.

„Тоа што се случи не беше експлозија на пиротехника, туку на некои други експлозивни направи кои биле складирани подолг временски период“, рече Ибрахим.

Складирани 2.750 тони амониум нитрат експлодираше во пристаништето во Бејрут синоќа, предизвикувајќи невидена смрт и штета во либанската престолнина, објави премиерот Хасан Диаб.

„Неприфатливо е товарот на амониум нитрат, проценет на 2.750 тони, шест години да се наоѓа во магацин, без никаков надзор“, изјавил тој на вечерниот состанок на Врховниот совет за одбрана.

„Тоа е неприфатливо и не можеме да молчиме за тоа прашање“, додаде тој.

Амониум нитрат е вештачко ѓубриво и исто така компонента на експлозив.

„Ние нема да запреме додека не го најдеме одговорното лице за тоа што се случи“, вети премиерот.

Експлозијата била еднаква на земјотрес со јачина од 3,5 степени, според германскиот гео-научен центар ГФЗ, а се слушнала и се почувствувала до Кипар, на повеќе од 200 километри преку Медитеранот, пренесува АП.

Причината за експлозијата сè уште не е позната, но првичните извештаи посочуваат дека избувнал голем пожар во магацинот во пристаништето и потоа дошло до уништувачки експлозии, при што огромен облак од прашина и чад брзо се раширил низ градот.