Една од главните улици во Приштина, именувана по поранешниот американски претседател Бил Клинтон, била блокирана откако полицијата била информирана дека на неа е забележан сомнителен куфер, пренесува „Коха“.
„Околу 10.30 часот добивме информација дека имало сомнителен куфер на улицата Бил Клинтон. Екипите на косовската полиција се на местото на настанот“, соопштено е од Косовската полиција.
Според приштинска Коха, специјалните единици на косовската полиција кои пристигнале на самото место, ја провериле содржината на торбата.
Куферот го пребарувале специјални припадници на полицијата, деминери, но и кучиња. По детална проверка, се покажало дека сомневањето е лажно, односно дека во куферот немало експлозивна направа.
Да потсетиме, сето ова се случува пред посетата на специјалниот пратеник на претседателот Трамп за дијалог меѓу Белград и Приштина, Ричард Гренел, кој лично ќе го следи спроведувањето на потпишаниот договор од Вашингтон.
Гренел ќе дојде со уште 13 други американски официјални лица кои ќе презентираат проекти за Косово и регионот во рамките на договорот постигнат со Србија.