Необична судбина го снајде холандскиот производител на електрични соларни автомобили Atlas Technologies, попознат под брендот Lightyear. Од 2019 година најавуваат автомобил кој има електричен погон, но и фотоволтаични панели на предниот капак и покривот, со цел полнење на батериите.
По првиот прототип Lightyear One ја претставија и првата сериска верзија Lightyear 0 со цена од 119.000 евра. Сепак, тие не го произведоа сами, туку ја доверија работата на компанија во Финска, но и продажбата и производството се покажаа како фијаско: беа нарачани помалку од илјада такви автомобили, додека на крајот на минатата година само еден пример неделно излегуваше од производната линија, пишува Autonet.
Овој јануари на саемот CES, Lightyear најави поевтин модел Lightyear 2, со цена од 41.000 евра и автономија до 800 километри. Овој модел беше опремен и со соларен полнач, а поради неговата разумна цена некои веќе го прогласија за многу конкурентен модел. Требаше да се појави во продажба во 2025 година.
Сепак, само неколку недели по таа презентација, компанијата зад соларните автомобили прогласи банкрот и започна стечајна постапка. Како дел од тој процес, управувањето со компанијата ќе го преземе стечаен управник, чија задача ќе биде да ги испочитува сите обврски кон вработените и доверителите и да изнајде начин за опстанок на компанијата.
Затоа, голем знак прашалник е и за судбината на нивните автомобили, особено на моделот Lightyear 2.