Соединетите држави денеска соопштија дека првата „лице в лице“ средба меѓу високи американски и талибански претставници откако Талибанците ја презедоа власта во Авганистан била „чесна и професионална“ и дека американската страна повтори дека на Талибанците ќе им се суди според нивните постапки, а не само со зборови.
Портпаролот на Стејт департментот, Нед Прајс, рече дека американската делегација во разговорите викендов во Доха се фокусираше на безбедносните и терористичките закани, безбедно поминување на американските државјани, како и други странски државјани и Авганистанци, како и човековите права, вклучувајќи значајно учество на жени и девојки во сите аспекти на авганистанското општество, пренесува Ројтерс.
Тој рече дека двете страни разговарале и за „американското обезбедување голема хуманитарна помош, директно на авганистанскиот народ“.
„Разговорите беа искрени и професионални со американската делегација, која повтори дека на Талибанците ќе им се суди според нивните постапки, а не само според нивните зборови“, рече Прајс во изјавата.
Сепак, не беше кажано дали е постигнат некаков договор.
Во саботата, катарската телевизија Ал Џезира, цитирајќи го в.д. министерот за надворешни работи на Авганистан, објави дека талибанските претставници побарале од американската страна да ја укине блокадата на девизните резерви на авганистанската централна банка.
Во соопштението се наведува дека министерот Амир Кан Мутаки, исто така, рече дека Вашингтон ќе им понуди на Авганистанците вакцина против вирусот корона и дека двете страни разговарале за „отворање нова страница“ меѓу двете земји.
Американските власти рекоа дека состанокот претпоставува продолжување на „прагматичните ангажмани“ со Талибанците, а не „признавање или давање легитимитет“ на групата.