Рускиот претседател Владимир Путин испрати телеграма со честитки до Олаф Шолц по повод инаугурацијата за германски канцелар, соопшти прес-службата на Кремљ.
„Односите меѓу Русија и Германија традиционално се од големо значење не само за народите на нашите земји, туку и за цела Европа. Се надевам дека ќе воспоставам конструктивен дијалог со вас и ќе работиме заедно на актуелните билатерални и меѓународни прашања. Тоа несомнено би одговарало на фундаменталните интереси на Русите и Германците и ќе придонесе за консолидација на стабилноста и безбедноста на регионално и глобално ниво“, се вели во честитката.
Путин испрати телеграма и до поранешната германска канцеларка Ангела Меркел. Според прес-службата, тој во својата телеграма и се обратил на „ти“ и ја уверил во продолжување на пријателската комуникација.
Во пораката до Меркел, рускиот лидер изразил „искрена благодарност за плодната соработка и подготвеност за дијалог со взаемно почитување“.
„Бевме во постојан контакт и се обидувавме да најдеме начини за излез од најтешките ситуации. За време на годините на чело на германската влада, со право стекнавте висок авторитет во Европа и во светот. Сигурен сум дека вашето богато искуство како државник и политичар секогаш ќе биде барано. И, се разбира, ќе продолжиме со нашата пријателска комуникација“, нагласи рускиот претседател.
Шолц на функцијата нов германски канцелар беше именуван од претседателот на Германија, Франк-Валтер Штајнмаер, а претходно за нов премиер беше избран на седницата на германскиот Бундестаг, каде доби апсолутно мнозинство гласови.