Путин: Зад нападот на мостот на Крим стојат украинските специјални служби

Рускиот претседател Владимир Путин денеска изјави дека украинските специјални служби стојат зад нападот кој го оштети мостот на Крим.

Руската Федерална служба за безбедност (ФСБ) претходно денеска соопшти дека терористичкиот напад на мостот на Крим го организирале Главната разузнавачка управа на министерството за одбрана на Украина и нејзиниот началник Кирил Буданов, а во текот на досегашната истрага се уапсени осум лица, објави „Интерфакс“.

Како што се наведува во соопштението на ФСБ, службата привела пет државјани на Русија и тројца државјани на Украина и Ерменија во рамки на истрагата за терористичкиот напад на мостот на Крим, а за организатор на терористичкиот напад е прогласена украинската воена разузнавачка служба.