Во исчекување на „понатамошни украински пробиви“, Русија гради тврдина и копа ровови километри зад фронтот на Крим – полуостров што го анектираше во 2014 година. Ова го покажуваат најновите извештаи кои ги пренесува The Telegraph.
„На територијата на Крим, под моја контрола, се врши утврдување со цел да се гарантира безбедноста на сите жители на Крим“, изјави во петокот прорускиот гувернер на регионот Сергеј Аксјонов. Тој додаде дека тоа се случува иако армијата веќе презела мерки за одбрана на Крим.
Овие наводи се во согласност со вчерашниот разузнавачки извештај на британското Министерство за одбрана, во кој се вели дека руските сили копаат ровови долж границата со Крим, како и во близина на реката Сиверски-Донец, која се наоѓа меѓу Луганск и Доњецк.
Украина продолжува со силна контраофанзива
Во некои области, тоа се случува на 60 километри длабоко зад линијата на фронтот, соопштија британските разузнавачи. Ова сугерира дека Русија се подготвува за украински пробиви, се додава во извештајот.
Во последните недели, Украина водеше успешна контраофанзива во која повторно зазеде повеќе од половина од територијата што ја загуби од Русија за време на војната. Минатата недела Украинците влегоа во Керсон, главниот град на украинскиот регион што граничи со Крим. Тоа беше уште еден удар за Русија, девет месеци по почетокот на инвазијата на соседната земја.
Знаци дека Москва е нервозна
Киев постојано нагласуваше дека ќе продолжат да се борат додека не ја вратат последната педа земја окупирана од Русија, вклучувајќи го и Крим.
Иако северната граница на анектираниот полуостров се уште е на десетици километри од линијата на фронтот, веќе имаше неколку успешни напади врз руските воени објекти и инфраструктура на Крим, вклучително и експлозија на мостот Керч што го поврзува со Русија во октомври.
Дека Москва е нервозна кога станува збор за пристапот на Украина кон Крим покажаа и новите сателитски снимки од копање ровови од минатата недела.