Русија ретко известува за загуби во своите редови, но денеска ја призна смртта на 71 свој војник.
Руската армија денеска ја призна смртта на 71 нејзин војник во операциите насочени кон одбивање на украинските напади на целиот украински фронт во последните три дена.
„Вкупно 71 војник загинаа, а 210 се ранети“ меѓу силите „ангажирани да го одбијат непријателскиот напад“, рече рускиот министер за одбрана Сергеј Шојгу.
Според него, оштетени се 15 тенкови и девет оклопни возила, како и две возила и артилериско оружје. Шојгу рече дека од неделата Украина употребила голема количина оружје на различни делови од фронтот и претрпела загуби.
„Обидите за напад беа спречени… Непријателот не ги постигна своите цели, претрпе значителни загуби“, додаде рускиот министер.
Руските власти во понеделникот соопштија дека нивните сили се соочуваат со големи украински напади, навестувајќи дека тоа би можело да биде голема контраофанзива што Киев ја подготвува со месеци.