Руската амбасада во Скопје обелодени дека македонската влада до денеска нема покажано интерес за вакцината „Спутник V“.
„На 18 август, пред пет месеци, го информиравме министерот за здравство Венко Филипче, дека доколку е заинтересирана Владата на Северна Македонија, Рускиот фонд за директни инвестиции, кој ги има ексклузивните права за производство и продажба на «Спутник V» во странски земји, може да започне разговори за сите прашања од интерес во однос на вакцината и нејзината набавка. Досега немаме добиено одговор за овој предлог“, велат од амбасадата на Руската федерација за Канал 77.
Од таму појаснуваат дека на 25 септември до шефот на Националниот комитет за имунизација, професор Александра Грозданова, било испратено писмо од Рускиот фонд за директни инвестиции. Во писмото била изразена подготвеност да се одржи состанок во формат на видео конференција за да се разгледат сите прашања околу вакцината.