Фудбалерот на шпанскиот прволигаш Селта Виго, репрезентативецот на Русија, Фјодор Смолов, го наруши карантинот кој е на сила во Шпанија поради пандемијата од коронавирус и се врати во Русија, објави во понеделникот шпанскиот „АС“.
Осврнувајќи се на изворите на клубот, „АС“ пишува дека Селта објави дека Смолов барал дозвола да се врати во татковината од лични причини, но Ла Лига не го дозволила тоа.
30-годишниот фудбалер ја известил Селта за неговиот потег и рекол дека ќе се врати кога ќе ги реши личните проблеми во Русија. Тој, наводно, отпатувал во Русија за да го прослави роденденот на својата девојка.
Тимскиот колега на Смолов, Пионе Систо, исто така ја напушти Шпанија минатиот месец, кршејќи ги правилата за карантин за враќање во Данска.
Шпанските медиуми објавија дека тој не ја информирал Селта за ова сè додека не ја напуштил земјата.