Руското обвинителство побара од судот да се прогласи за виновна блиската соработничка на Алексеј Навални, Љубов Собол, поради кршење на безбедносните протоколи на Ковид-19.
Обвинителството, исто така, бара судот да и воведе одредени ограничувања во следните две години, рече нејзиниот адвокат.
Обвинителството побара судот да определи куќен притвор за Собол од 22 часот до 6 часот наутро во следните две години, да и биде забрането да присуствува на големи настани или политички собири и да има обврска да се јавува во полициска станица четири пати месечно, откри адвокатот Владимир Вороњин на Твитер.
Собол, која вели дека обвинението против неа е политички мотивирано, е обвинета дека ги прекршила анти-ковид мерките на улични протести за време на поддршката за Навални оваа година.
Таа првично беше во домашен притвор, а неколку блиски сојузници на Навални, вклучувајќи го и нејзиниот брат, се на суд за истото дело.
Навални издржува затворска казна во траење од две и пол години за кршење на условна казна.