„Tрибините не се новина за СДСМ“, изјави за „Локално“, Богданка Кузеска, портпаролка на СДСМ, запрашана дали започнувањето на граѓанските трибини „За иднина на државата“ означуваат сигнал за предверемени парламентарни избори.
– Ние сме постојано на терен во комуникација со граѓаните и ова е уште една можност одблиску да ги претставиме нашата цел и визија за иднината на државата, изјави Кузеска.
Инаку, СДСМ од денес почнува граѓански трибини за политиките на партијата и за иднината на државата.
– СДСМ од денес започнува со серија граѓански трибини каде заедно со граѓаните отворено ќе разговараме за мерките и политиките на СДСМ, за нашата визија за иднината на нашата македонска држава. Визија зе економски силна и стабилна држава, полноправна членка на ЕУ, со заштитен македонски јазик и идентитет, соопштија од СДСМ.
Премиерот Димитар Ковачевски вчера при најавата на трибините соопшти дека неговата визија е економски силна и стабилна држава, полноправна членка на ЕУ, со заштитен македонски јазик и идентитет.
„Се грижиме за граѓаните и за животниот стандард во време на криза. Но гледаме и напред, за нашите деца да можат горди и со крената глава да ја градат својата иднина дома, во земја членка на ЕУ“, порача Ковачевски пред денешниот настан во 18.30 часот во Домот за културата во Битола.
Д.Ј.