Шилегов: Скопје се претвора во зелена престолнина, нов градски дрворед на булеварот „Гоце Делчев“

од Nikola Popovski

Висококвалитетни дрва го формираат новиот дрворед на булеварот Гоце Делчев каде што во изминатиов период го обновивме нискостеблестото зеленило не само во средишната жардиниера, туку и страничното на површина од над 9.100 квадратни метри, истакна градоначалникот Петре Шилегов, кој заедно со градоначалникот на Општина Центар, Саша Богдановиќ и директорот на ЈП „Паркови и зеленило“, Ардијан Муча, симболично ја почнаа пролетната сезона на садење за оваа година.

Тој изјави дека само од високостеблести дрвја во периодов имаат засадено околу 18 илјади.

„Во изминативе три години обновивме над 260 квадратни метри зеленило, и минатата година го срушивме рекордот со изградба на преку 100. 000 квадратни метри на нови и обновени зелени површини. Во исто време паралелно на повеќе локации низ нашиот град се врши обновување на постојното зеленило, а се формира зеленило и на новите четири булевари“, додава Шилегов.

Тој истакна дека на општо задоволство Скопје чекор по чекор се претвора во зелена престолнина каква што скопјани заслужуваат, односно со високи европски стандарди на уредување на зеленилото коешто е под ингеренции на Градот.

На овој зелен коридор, од двете страни на коловозот и во средишното зеленило на булеварот Гоце Делчев, годинава ќе се засадат вкупно 571 садници, од кои зимзелени се 75, листопадни 28, а 468 садници грмушки. Изминатата 2020 година на овој потег се засадени вкупно 1013 садници, односно 150 зимзелени, 28 листопадни, и 835 садници грмушки и перени.

Слични содржини