Штипјанката Драгица Панова два месеци се обидува да докаже дека е жива пред Фондот за ПИОМ. Бизарната приказна на жената, започнува откако починал нејзиниот сопруг на почетокот на оваа година, пренесува ТВ Стар.
„Мојот сопруг почина на 4 јануари, и јас сум заведена како почината на 4 јануари, а по кој основ сум заведена како мртва не знам. Од јануари наваму јас немам добиено пензија. Никој не сака да ми објасни што е проблемот“, изјави Драгица за ТВ Стар.
Од тогаш Драгица оди од врата до врата обидувајќи се да докаже дека е жива и да обезбеди редовен прием на пензијата, но до денеска сите обиди и се неуспешни.
„Во месец март ги исправив документите, и рекоа дека ќе биде. Но отидов да земам пензија и ми рекоа дека нема, истото го рекоа и во април“, вели таа.
Драгица во меѓувреме се снаоѓа на различни начини и чека администрацијата да го среди проблемот.
„Позајмував пари и сега како да ги вратам? Кажете ми што да правам јас без пензија? Ова што се случува е срамота, од жив да те направат умрен и да те остават без денар. Пополнив потврда за живот, рекоа ќе се среди. Кога ќе се среди?“, прашува Драгица.