Унгарскиот министер за надворешни работи Петер Сијарто денеска во Мостар изјави дека Унгарија ја смета за неприфатлива бавната интеграција на земјите од Западен Балкан во Европската унија.
„Таквото однесување на Брисел е исклучително штетно во однос на регионалната стабилност. Затоа, дојде време да му кажеме на Брисел: „Треба да се симнете од високото седло и повеќе не е време за арогантни изјави“, рече Сијарто на отворањето на Меѓународниот саем во Мостар.
Тој рече дека не треба да се зборува за лидерите на Западен Балкан, туку дека треба да разговараме со нив.
„Треба да се направи напор да се дојде овде за да се разбере ситуацијата. Ако дојдат овде веројатно ќе сфатат дека не можат да го решат прашањето за лидерите кои дејствуваат во оваа област само со мавтање со рацете“, рече шефот на унгарската дипломатија.
Зборувајќи за надворешната политика на Унгарија, Сијарто рече дека нејзиниот фокус е на заемно зајакнување на односите со земјите од Западен Балкан.
„Нашата цел е да ја забрзаме европската интеграција во оваа област“, рече Сијарто.
Тој повтори дека Србија треба да биде примена во Европската унија без одлагање, а Босна и Херцеговина да добие кандидатски статус.
Сијарто додаде дека по новата победа на изборите со двотретинско мнозинство, владата на премиерот Виктор Орбан ќе работи уште повеќе на тоа.