Силно невреме во четвртокот зафати неколку делови на Европа, при што четири лица ги загубија животите во Полска.
Според полските медиуми, најтешко погоденото подрачје е западниот град Вроцлав. Невремето обори дрвја и предизвика значителна штета, а сообраќајот беше во прекин во некои делови на Полска.
Освен во Полска, невремето ги зафати и француските региони Бретања и Нормандија, каде оштети неколку куќи и предизвика прекин на снабдувањето со електрична енергија за речиси четвртина милион домаќинства.
Невремето ги зафати и Германија, Холандија и Белгија, каде оштети покриви на многу згради, вклучително и дел од стадионот во белгискиот град Антверпен, пренесе АП. Во Берлин две зоолошки градини се затворени поради прогнозираниот силен ветер, а животните се преместени во затворени засолништа.
Невремето погоди и делови од јужна Англија каде што беа издадени предупредувања за поплави поради обилните врнежи.