Фудбалскиот клуб Широки Бријег објави на официјалните страници на социјалните мрежи дека дури 18 нивни играчи биле заразени со коронавирус.
Тоа само по себе е проблем, а е уште поголем кога се знае дека претходниот викенд го одиграле дерби натпреварот против Сараево, кој го загубија со 0:2.
Широки побарал од Фудбалскиот сојуз на БиХ итно да го одложи натпреварот бидејќи коронавирусот влегол во тимот, но нивното барање беше одбиено.
Во тимот имало само 13 играчи, а подоцна се покажа дека дури шестмина од нив биле позитивни на Ковид-19.
„Заедно со оние 12 играчи кои почувствуваа симптоми и кои беа навремено изолирани, денешното тестирање потврди дека уште еден член на стручниот штаб и дури шестмина играчи на клубот, кои играа на дербито од 11-то коло во Премиер лигата на БиХ против ФК Сараево на „Кожево“, се позитивниза коронавирус “, се наведува во соопштението на Широки.
„Се плашевме од ваков епилог и не станува збор само за НК Широки Бријег, туку за сите нас. Прашање е на здравјето и заштита на животот, како на нашите играчи, така и на ривалите, судиите и сите други кои учествуваат во организирање на натпревари”, соопштиле од клубот, по што додале:
„НК Широки во моментов има само шест играчи од сениорскиот тим на располагање за тренинзите и натпреварите што следат. Ние официјално ќе бараме следните натпревари да се одложат, во надеж дека властите конечно ќе „прогледаат“ – во интерес на фудбалот и здравјето на играчите. Мораме сериозно да му пристапиме на овој проблем и да видиме каде не води сето ова. Денес е Широки, а утре можеби некој друг …“, стои во клупското соопштение.