Членовите на координацијата на новинарските синдикати на Радиотелевизија на Словенија (РТВС) денеска предупредија на загрижувачката состојба во таа медиумска куќа и повикаа на референдум за измените на законот за РТВС.
Зборувајќи за состојбата во РТВС, каде што штрајкот на новинарите трае веќе половина година, присутните истакнаа дека состојбата е влошена откако пред една година најпрвин укажаа на непромислени интервенции во информативната програма, а најавија штрајк пред 180 дена. Беше посочено дека постоечкиот закон од 2005 година е „лош, штетен и застарен“ и неопходни се негови измени.
Генералниот секретар на Синдикатот на новинарите на Словенија, Мојца Забуковец, потсети дека штрајкувачите и по 180 дена не постигнале договор за штрајк, а раководството на РТВС продолжува да ја уништува автономијата на таа медиумска куќа.
Претставниците на вработените повикаа на референдум наведувајќи дека неделното изјаснување е крајно време јавните медиуми да се вратат на јавноста, заедницата и младите.
Со измените на Законот за РТВС, за чие стапување во сила гласачите ќе одлучуваат на референдумот во недела, меѓу другото се менува и начинот на управување со јавната радио телевизија.
Во врска со ова се посочени принципите на деполитизација, плурализам, еднотретинско коодлучување на работниците и експертска финансиска контрола.
Најавувајќи ги измените на законот на почетокот на летото, новата словенечка влада и Министерството за култура истакнаа дека целта на овие измени е да се обезбеди целосна институционална и програмска автономија на оваа медиумска куќа, новинарска автономија и уредувачка независност. Измените на законот ќе ги исклучат политичките партии од назначувањето на раководните тела на РТВ Словенија со цел да се деполитизираат најголемите јавни медиуми, изјавија предлагачите.
Државното собрание усвои амандман за РТВС во јули, но барањето на опозициската Словенечка демократска партија за распишување законодавен референдум го спречи неговото спроведување.
За време на мандатот на поранешниот премиер Јанез Јанша често се посочуваше политички притисок врз медиумите и политичко влијание врз нивното функционирање, па поранешниот премиер беше на удар на европските критичари за ограничување на слободата на медиумите.
Референдумот в недела ќе содржи предлози за закони за РТВС, за влада и за долгорочна нега. Предлозите имаат поддршка од гласачите, покажува анкетата што за „Младина“ ја спроведе агенцијата „Нинамедија“, а јави словенечката агенција СТА, наведувајќи дека 57 отсто од испитаниците се изјасниле дека сигурно или веројатно ќе излезат на референдумот.