Времето денеска ќе биде облачно со пообилни врнежи (на повеќе места над 25л/м2, а локално и над 30л/м2). Вренежите во западните и северните делови, како и на повисоките места ќе бидат претежно од снег. Ќе се формира нова снежна покривка, особено во западните делови. Ќе дува слаб до умерен, вдолж Повардарието повремено засилен северен ветер. Максималната температура ќе биде во интервал од 4 до 10 степени, најави Управата за хидрометеоролошки работи (УХМР).
Во Скопје облачно со врнежи од дожд и повремен снег и со слаб до умерен сверен ветер. Попладне врнежите ќе бидат претежно од снег и ќе се формира помала снежна покривка.
За утре УХМР најавува повремени локални врнежи претежно од снег. Ќе дува умерен до засилен северен ветер. Од среда следува период на стабилно, суво и ветровито време со умерен до засилен северен ветер. Минималните температури насекаде ќе бидат под нулата, а најстудено ќе биде во четврток и петок кога утринските температури на места ќе се спуштаат и под -10 степени, а дневните понекаде ќе останат негативни.
Во исчекување на најавените врнежи од снег, Општина Аеродром ги потсетува жителите и правните лица дека според Законот за јавна чистота имаат законска обврска да го чистат снегот пред влезовите на своите домови и објекти со што ќе се обезбеди непречен пристап до нив.
-Според членот 9 од Законот, одржувањето на јавната чистота во општинска сопственост го врши општината, а на објекти во приватна сопственост и на дворните површини го врши сопственикот на објектот.Во однос на обврските на Општината, ги информираме граѓаните дека на располагање се ставени сопствени возила за чистење снег на улиците, тротоарите и други јавни површини, а за таа цел се набавени и околу 200 тони сол. Активиран е и кризен штаб со кој директно ќе раководи градоначалникот Тимчо Муцунски. Штабот ќе се грижи за реализација на донесениот план чија цел е да обезбеди олеснет пристап и движење на граѓаните во зимски услови.Истовремено, Општина Аеродром презема активности за навремено известување на физичките и правните лица за обврските кои ги имаат за време на снежните врнежи. Во колективните станбени згради одржувањето на јавната чистота се задолжува да ја врши куќниот совет.Ги повикуваме жителите да ги почитуваат пропишаните одредби и со тоа заеднички да придонесеме за поголема безбедност на аеродромци, информираат од општина.