Со уредба се регулира секоја фирма да може да доставува фактури по електронски пат

од Vladimir Zorba

Со донесена уредба од страна на Владата, а во насока на превенција од Ковид-19, се овозможува секоја фирма да издава фактури во електронска форма, ПДФ, без разлика дали е потпишана со дигитален сертификат или не, до своите клиенти, соопштија од Министерството за финансии.

Од Министерството наведоа дека на тој начин компаниите ќе се ослободат од потребата за печатење и достава на фактури во услови на намалени ресурси и дополнително ќе се стимулира промена на навиките за во иднина.

– Доколку компанијата поседува email или контакт телефон од купувачот ќе може да почне да му ги испраќа фактурите по електронски пат. Доколку не поседува ќе продолжи да ги испраќа во печатена форма по пошта на тие приматели. Примачот на фактурата, доколку не сака да добива сметка/фактура по електронски пат во рок од 10 дена од приемот ќе може да информира дека претпочита хартиена форма. Доколку не одговори ќе се смета дека се согласил. Фактурата во електронска форма ќе мора да ги содржи сите елементи за цели на ДДВ, образложија од Министерството за финансии.

Имено, како што истакнаа од Министерството опцијата за печатена фактура за оние граѓани и фирми кои го преферираат тоа и понатаму е отворена.

Слични содржини