Спасовски: Ја остваривме првата од двете стратешки цели, 27 март се запишува со златни букви

од Nikola Popovski

Република Северна Македонија и официјално е новата, 30-та членка на НАТО. 27 март се запишува со златни букви во нашата историја. Ја остваривме првата од двете стратешки цели, објави на својот фејсбук профил премиерот Оливер Спасовски, по депонирањето на инструментот за ратификација на Северноатлантскиот договор.

– Денеска во Вашингтон го депониравме инструментот за ратификација на Северноатлантскиот договор во Стејт департментот на Соединетите Американски Држави. Република Северна Македонија и официјално е новата, 30-та членка на НАТО.

27 март се запишува со златни букви во нашата историја. Ја остваривме првата од двете стратешки цели. Го исполнивме сонот на сите генерации кои се вградија во остварувањето на деценискиот стремеж нашата татковина да ја направиме членка на НАТО.

Од денеска сме дел од глобалните процеси, и заедно со нашите партнери во Алијансата стануваме фактор за стабилност и безбедност во регионот, и заеднички со нашите сојузници ќе се справуваме со сите закани за сигурноста, безбедноста и ќе го чуваме мирот во светот.

Да живее Република Северна Македонија – земја-членка на НАТО, објави на својот Фејсбук профил Спасовски.

Слични содржини