Често се случува на плажа, опиени од сончевите зраци, да заспиеме несвесно, што може да биде многу опасно.
Спиењето на сонце, иако звучи безопасно, не е секогаш добра идеја бидејќи со себе носи сериозни здравствени последици, пишува „Гламур“.
„Дремувањето на сонце всушност може да предизвика голема штета. Да се потпрете само на кремата за сончање како единствената одбрана е погрешно, тоа нема да ве направи помалку ранливи на сонце, а особено ќе се изгорите на места каде што не сте успеале да нанесете крема за сончање или сте ја нанеле во потенкиот слој“, тврди Хариет Далвуд, портпарол за британските здруженија на дерматолози.
„Кремот за сончање може да се отстрани и со потење, треба да го нанесувате на секои два часа, најмалку. Исто така, кремот со SPF фактор треба да биде една од заштитите од сонце, но не и единствениот. Затоа ги охрабруваме луѓето да користат заштитна облека и да одат во сенка. Важно е да се има предвид дека штом еднаш нанесе штета на кожата, таа не може да се врати, затоа, ако сте на плажа и се чувствувате уморни, засолнете се од сонцето под сенка“, објасни таа.
Сите знаеме колку е важно да се носат креми кои содржат заштитен фактор, а многу луѓе сега дури уживаат во нанесувањето на избраната крема за сончање благодарение на современите формулации кои не се густи и не оставаат бел белег.
Но, да бидеме искрени, веројатно немаме сите навика често да нанесуваме крема за сончање. И дури и да имаме, тешко дека ќе посветиме подеднакво внимание на секој дел од кожата.
Оштетувањата на кожата, естетски и здравствени, лесно се добиваат додека дремете во вашата градина, на плажа или во парк. Д-р Тиви Марутапу, дерматолог и портпарол на британската фондација за кожа, вели дека спиењето на сонце е „кошмар за дерматолозите“.
„Вие сте изложени на ризик од изгореници од сонцето затоа што не сте свесни колку е силно сонцето и веројатно нема да ставите крема за сончање до потребниот степен. Ако сепак сакате да спиете, најдете место во сенка, нанесете заштитен фактор и би било добро да користите заштитна облека која е тестирана според стандардите на SPF. Исто така, би било добро да поставите аларм на телефонот за да не спиете премногу долго, и задолжително ставете многу крем со заштитен фактор на секои неколку часа“, советува д-р Марутапу.
Освен кожата, постојат и други ризици. Д-р Клаудија Пастидес предупредува дека може да се појави и дехидрираност.
Телото мора да ја регулира својата внатрешна температура со цел внатрешните органи да работат правилно. Тоа го прави на повеќе различни начини, а еден од нив е потење.
„Потењето може да предизвика дехидрираност, а дехидрираноста може да предизвика слабост, замор, главоболки и вртоглавица.
Тешка дехидратација може да биде фатална. Затоа, пијте доволно вода кога се високи температурите и избегнувајте да спиете кога сте директно изложени на сончева светлина“, објаснува лекарот.
Други сериозни проблеми што треба да се земат предвид се топлотен удар и зголемена можност за развој на рак на кожата. Краткиот сон на сонце може да доведе до изгореници на кои ќе им бидат потребни денови да зараснат. Затоа, следниот пат, изберете место во сенка или поставете го алармот за 20 минути. Вашето тело ќе биде благодарно за тоа.