Традиционално добрите односи со Русија, кои биле пофалени од скоро секоја влада во Србија, ќе бидат најголемиот тест досега овој пат. Ова може да се заклучи врз основа на составот на новата влада и чистењето на „руските кадри“ низ кои поминала. Откажувањето на претходно најавената посета на Владимир Путин и потпишувањето на Вашингтонскиот договор очигледно придонесоа за затегнување на односите меѓу двете земји, поради што Москва е сè пооддалечена од Немањина 11.
Одлуката на Александар Вучиќ да го намали бројот на министерски места во српската влада од четири на две за неговите коалициски партнери – Министерството за образование (плус функцијата потпретседател) и Министерството без ресор, претставува најновиот удар за „руските играчи“ во српската влада.
Фактот дека оддалечувањето од Москва стана нова реалност покажува и неизвесната судбина на поранешниот министер без ресор задолжен за иновации, Ненад Поповиќ, кој важел за еден од најблиските луѓе до официјалниот Кремљ во рамките на коалицијата собрана околу Српската напредна партија, пишува „Нова.рс“.
Во Вашингтонскиот договор, потпишан во присуство на американскиот претседател Доналд Трамп, првиот човек на српската држава учиќ и премиерот на Косово, Авдулах Хоти, се наведува дека Белград и Приштина ќе ги диверзифицираат своите енергетски резерви, што е директно отклонување од Русија.
Со оглед на тоа што Москва и Вашингтон со години се натпреваруваа за влијание врз Балканот, подоцнежната одлука на рускиот претседател Владимир Путин да не дојде во најавената посета на Белград, порталот Нова го толкува како сигнал до српските власти дека постојат проблеми и дека односите повеќе не се „идилични“ како што беа порано.
Јакшиќ: Влијанието на Москва стана ограничено
Аналитичарот за надворешна политика, Бошко Јакшиќ, посочува дека договорот во Вашингтон, со кој Србија за првпат официјално отстапи од официјална Москва, дефинитивно влијаеше на составот на новата влада.
„Иако властите во Србија сакаат да ја претстават најавената посета на министерот за надворешни работи на Русија, Сергеј Лавров, како доказ за добрите односи, тоа не е случај. Тој доаѓа од спротивни причини и со намера да ги поправи расипаните односи. Неговата намера е да добие информации во разговор со властите во Србија, до кој степен руското влијание ќе функционира во наредниот период“, забележува Јакшиќ.
Според него, српската влада не може да си дозволи луксуз за натамошно влошување на односите со Русите и во наредниот период ќе се обиде да ја надомести нанесената штета.
„Србија ќе продолжи да повторува дека никогаш нема да воведува санкции за Русија и дека има економски интереси за соработка. Факт е дека влијанието на официјална Москва врз Србија е ограничено и дека присуството на Америка е посилно. Вучиќ ќе треба да му објасни на Лавров зошто им се направени отстапки на САД“, истакнал Јакшиќ.
Стојановиќ: Заминувањето на Поповиќ може да биде политичка порака
Според политикологот Бобан Стојановиќ, изборот на кадри во српската влада, каде има забележително помалку политичари блиски до официјална Москва, треба да испрати порака, но мора да почекаме на конечната одлука дали Ненад Поповиќ, како „руски човек“, ќе биде дел од на новата Влада на Србија.
„Треба да почекаме и да видиме како ќе се развиваат работите во иднина. Веројатно се работи за одредена политичка порака, но ми се чини дека СНС презема одредени сектори кои се финансиски интересни за сите“, наведува Стојановиќ.