Силниот тениски турнир во Мајами кај дамите ќе има нова шампионка оваа година, откако четвртата во светот, Слоун Стивенс го напушти натпреварувањето уште по третиот круг.
Американката изгуби со 3:6, 2:6 за нешто повеќе од час и половина од германската тенисерка Татјана Марија.
Марија беше поконцентрирана од двете во важните поени и вкупно пет пати победи на сервис на Стивенс, а за возврат допушти два брејка.
Во следниот круг, Германката ќе игра против Чехињата Маркета Вондроушова.
Втората во шемата, Симона Халеп и Каролина Плишкова, исто така, продолжуваат напред во Мајами, иако по тешки победи во три сета. Романката ја надигра „среќната губитничка“ Полона Херцог од Словенија по пресврт – 5:7, 7:6 (1), 6:2, додека Чехињата на сличен начин, но малку полесно, ја отстрани Ализе Корне од Франција – 6:7 (3), 6:1, 6:4.
Халеп игра против Венус Вилијамс во следниот дуел, а Плишкова ќе се соочи со Јулија Путинцева (Казахстан).