Во исчекувањето на вакцината против коронавирус, Светската здравствена организација го објави планот за дистрибуција на вакцината ширум светот.
Пристапот на СЗО треба да го победи „национализмот на вакцините“, односно идејата дека секоја земја треба да размислува само за своите граѓани.
Во договор со Стратешката советодавна група на експерти за имунизација (САГЕ), СЗО прифаќа глобален пристап, давајќи им приоритет на вакцинацијата на најранливите групи на луѓе низ целиот свет.
– Првиот приоритет мора да биде вакцинирање на некои луѓе во сите земји, наместо сите луѓе во некои земји – рече директорот на СЗО, д-р Тедрос Аданом Гебрејезус во Женева.
Покрај стратегијата за правична дистрибуција меѓу земјите, рамката на СЗО ги испитува и приоритетите за вакцинација во секоја земја. Упатствата на СЗО не вклучуваат редослед по кој одредени групи би ја примиле вакцината, но планот нагласува одредени ранливи групи како приоритет кои ќе имаат глобално влијание, со одредена флексибилност заснована врз уникатните потреби на секоја земја.
Минатата недела, одборот кој ги советува американските Центри за контрола и превенција на болести предложи четири последователни фази за одредување приоритет на вакцинацијата во САД, почнувајќи од високо ризичните здравствени работници, луѓе со сериозна медицинска состојба и стари лица кои живеат во поголеми институции или заедници.