Најновиот неделен број на случаи со коронавирус во Европа ги надмина резултатите забележани кога пандемијата за првпат го достигна врвот во март, соопшти Светската здравствена организација (СЗО), пренесе „Н1“.
Зборувајќи во четвртокот, регионалниот директор на СЗО Ханс Клуге рече дека само минатата недела се пријавени 300.000 нови инфекции.
„Пред нас е многу сериозна ситуација“, рече тој.
Некои европски земји, вклучително и Велика Британија и Франција, забележаа највисоки дневни бројки во последните месеци.
Капацитетите за тестирање се зголемија низ цела Европа од почетокот на пандемијата, што значи дека и бројот на заразени веројатно ќе биде поголем. Клуге додаде дека новите податоци исто така покажуваат „алармантни стапки на пренесување во регионот“.
Приемот во болницата и смртноста сè уште не забележале слично зголемување, иако Шпанија и Франција бележат тренд на раст. Иако помладите – кои имаат помала веројатност сериозно да бидат погодени доколку се заразат – во моментов го сочинуваат најголемиот дел од ново регистрираните случаи на коронавирус, постои страв од многу поголем број сериозни случаи доколку вирусот се прошири на постари и поранливи групи.
Претходно оваа недела, Клуге предупреди дека Европа треба да се подготви за зголемување на бројот на смртни случаи од коронавирус во октомври и ноември, предупредувајќи дека ќе биде се потешко.