Генералниот директор на Светската здравствена организација (СЗО) Тедрос Аданом Гебрејесус изјави дека стапката на смртност поврзана со ковид е намалена за 90 отсто во споредба со февруари.
Гебрејесус одржа онлајн состанок во седиштето на СЗО во врска со пандемијата на ковид-19.
Тој потсети дека во светот во февруари се регистрирани 75.000 смртни случаи поврзани со ковид, а оваа бројка минатата недела била за 90 отсто помала и изнесувала 9.400.
„Поминавме долг пат и ова секако е причина за оптимизам. Но, ги повикуваме сите влади, заедници и поединци да бидат внимателни“, рече тој.
Директорот на СЗО рече и дека и покрај тоа што може да се спречи ковид и има терапија, бројката од просечно 10.000 смртни случаи неделно е сè уште многу висока.
Гебрејесус додаде дека сè уште има многу висока разлика во процентот на вакцинирани луѓе во развиените и неразвиените земји и предупреди дека новите варијанти на ковид продолжуваат брзо да се шират, поради што е потребна претпазливост.