Телото на тинејџерката која учествуваше на протестите во Иран и исчезна во септември, беше пронајдено во мртовечница во притворски центар.
Откако му било предадено на семејството, било украдено и тајно закопано, јавува Би-Би-Си.
Ника Шакрами, која живееше во Техеран и во недела ќе наполнеше 17 години, исчезна во септември, а нејзиното семејство беше повикано во саботата да го земе нејзиното тело во мртовечницата во притворскиот центар 10 дена подоцна, објави Би-Би-Си. Семејството планирало да ја погреба Ника во понеделник, но нејзиното тело било украдено и погребано во село оддалечено околу 40 километри, велат изворите.
Ника, која учествуваше во антивладините демонстрации, исчезна 10 дена по протестите во Техеран на 20 септември, а во нејзината последна порака до пријател навела дека ја бркаат безбедносните сили, изјавија нејзините роднини за Би-Би-Си.
Во септември во Иран избувнаа антивладини протести по смртта на младата Иранка Махса Амини (22), која беше приведена од полицијата за морал.
Амини паднала во кома неколку часа откако беше уапсена од полицијата за морал поради наводно кршење на правилата за хиџаб.
Протестите започнаа по нејзиниот погреб, се проширија низ целата земја и станаа најголемите немири видени во земјата во последните години.
Во вторникот, иранскиот претседател Ебрахим Раиси повика на единство против протестите кои продолжуваат да растат и ги зближуваат Иранците и покрај етничките и класните поделби и напорите на властите да ги задушат, пишува „Гардијан“.
Раиси го повтори официјалниот став на владата дека протестите ги започнале странски провокатори, но призна дека Иранците се лути поради одредени „неуспеси“ на Исламската Република.