Поранешниот американски претседател Доналд Трамп ги повика Американците да се „молат“ по одлуката на Русија да распореди тактичко нуклеарно оружје во Белорусија.
Во своето обраќање Трамп не го спомна фактот дека САД го распоредуваат своето нуклеарно оружје во Европа.
„Одиме!!! Како што предвидов, сега си играме со „големите работи“. Сега зборот што почнува со „N“ се користи со големо значење. Ние ја предизвикавме оваа ситуација. Ова се случува кога имате неспособни луѓе кои ја водат вашата влада. Сè што можам да ви кажам сега е: молете се“, рече Трамп во објавата на неговата социјална мрежа „Truth Social“.
Рускиот претседател Владимир Путин во саботата, 25 март, рече дека Минск и Москва се договориле да распоредат руско нуклеарно оружје во Белорусија, што не претставува кршење на обврските на Русија за неширење.
Според него, Русија не го пренесува своето нуклеарно оружје во Белорусија, туку го прави она што САД го прават со децении – стационирање на своето тактичко нуклеарно оружје на територијата на своите сојузници и обука на војската да го користи оружјето.
Белоруското Министерство за надворешни работи претходно денеска соопшти дека распоредувањето нуклеарни боеви глави на територијата на Белорусија без да му се даде контрола на Минск над нив не е во спротивност со одредбите од Договорот за неширење на нуклеарно оружје.
Притоа, Министерството нагласи дека распоредувањето на тактичко нуклеарно оружје на територијата на друга земја не е новост во воената соработка на ненуклеарните и нуклеарните сили, истакнувајќи дека НАТО веќе подолго време практикува заеднички нуклеарни мисии.