Американскиот претседател Доналд Трамп издаде извршна наредба за проширување на овластувањата на Белата куќа врз регулаторните агенции кои Конгресот ги основаше како независни.
Со овој потег, Трамп ги продолжува своите напори да ја централизира претседателската моќ над државната администрација и да стане најмоќниот претседател во историјата на САД.
Регулативата бара од независните агенции да достават регулаторни предлози до Белата куќа за разгледување, а на претседателот му дава право да ги блокира трошењата за проекти кои не се во согласност со неговите приоритети. Исто така, на агенциите им е наредено да го прифатат толкувањето на законот што доаѓа од претседателот и Министерството за правда како обврзувачки.
„Ова е значаен удар за независните агенции, чиј модел на управување го користи Конгресот од 1880-тите“, рече Питер М. Шејн, експерт за право на Универзитетот во Њујорк.
Наредбата на Трамп доаѓа откако тој веќе смени неколку шефови на независни агенции, иако законите ја ограничија нивната способност да ги отпуштат без добра причина пред истекот на мандатот. Меѓу засегнатите институции се Комисијата за хартии од вредност (SEC), Федералната трговска комисија (FTC), Федералната комисија за комуникации (FCC) и Националниот одбор за работни односи (NLRB).
Федералните резерви исто така се делумно покриени, но одлуките за монетарната политика, како што се промените во каматните стапки, се изземени од регулативата.
Оваа регулатива се надоврзува на претходните мерки за зајакнување на претседателскиот надзор, вклучително и иницијативата на Роналд Реган од 1981 година, која бараше предложените прописи да бидат доставени до Белата куќа за преглед. Сепак, регулативата на Реган не се однесуваше на независните агенции.
Администрацијата на Трамп се залага за укинување на законските ограничувања што го спречуваат претседателот да ги отстрани членовите на овие агенции пред да истечат нивните мандати. Критичарите предупредуваат дека овој потег може да ја загрози институционалната рамнотежа и да го ослабне надзорот врз извршната власт.
Регулативата се очекува да предизвика правни спорови и потенцијални предизвици пред Врховниот суд.