Берзанските индекси на Волстрит во понеделникот забележаа остар пад, продолжувајќи го негативниот тренд од минатата седмица. Индексот Dow Jones падна за 2,08%, S&P 500 потона за 2,70%, додека Nasdaq загуби дури 4,0%, влегувајќи во територија на корекција.
Инвеститорите остануваат несигурни поради трговската политика на администрацијата на претседателот Доналд Трамп. Тој одби да ја коментира ситуацијата со царините и можните последици врз економијата.
„Загриженоста расте, па инвеститорите се повлекуваат, но макроекономските податоци сè уште не се премногу алармантни“, изјави Том Хејнлин, стратег во „У,С Банк Велт Менаџмент“.
Технолошкиот сектор забележа најголем удар, со 4,4% пад на индексот S&P 500, а акциите на Тесла загубија над 15% од вредноста, бришејќи 800 милијарди долари од пазарната капитализација.
Дополнителен притисок врз пазарот создаде и зајакнувањето на јапонскиот јен и растот на приносите на јапонските државни обврзници.
„Ако сакате да разберете што се случува, следете ги приносите на јапонските државни обврзници, а не тарифите. Падот на поврзаното тргување директно ги погоди американските технолошки гиганти“, изјави Томас Хејс, претседател на „Грејт Хил Капитал“.
Индексот VIX, познат како „индекс на стравот“, го достигна највисокото ниво од август минатата година, сигнализирајќи дека инвеститорите сè повеќе ги штитат своите портфолија од можен натамошен пад.
Падови беа забележани и на европските берзи: FTSE 100 во Лондон се намали за 0,92%, франкфуртскиот DAX загуби 1,69%, а парискиот CAC 40 падна за 0,90%.