Трошоците за живот во Русија нагло растат по инвазијата на Украина, покажуваат официјалните податоци. Цените на некои основни производи, како што е шеќерот, за само една недела скокнале за цели 14%.
Се очекува дека инфлацијата во Русија ќе продолжи да расте.
Вредноста на рубљата годинава падна за 22%. Според Министерството за економија, годишната инфлација скокна за 14,5% во март – највисоко ниво од крајот на 2015 година
Цените на кромидот се исто така едно од најголемите поскапувања – 13,7% низ целата земја и 40,4% во некои области.
Во меѓувреме, пелените поскапеа за 4,4%, а тоалетната хартија за 3%.
Видеа на социјалните мрежи прикажуваат клиенти кои чекаат на ред да купат шеќер и леќата во супермаркетите во Москва.
Во позадина на ова, многу западни компании се повлекоа од Русија поради војната во Украина. Швајцарскиот прехранбен гигант Nestle ги повлече големите брендови како KitKat и Nesquik, но сепак ќе продолжи да продава основна храна на локалниот пазар.
Компанијата престана да инвестира во земјата на почетокот на овој месец, а се поголем број западни брендови ја прекинаа работата во Русија во знак на протест поради војната.
Украинскиот претседател Влодимир Зеленски го критикуваше Nestle дека сè уште работи во Русија. Претходно, украинскиот премиер Денис Шмигал на социјалните мрежи напиша дека шефот на Nestle, Марк Шнајдер „не покажува разбирање“. Ова доведе до трендот #BoycottNestle на Twitter.
Компанијата постепено ги намалува своите операции во Русија од почетокот на војната во Украина, но е под притисок целосно да се повлече.
На почетокот на овој месец, компанијата престана да испорачува производи како што се капсулите за кафе Nespresso и водата San Pellegrino, но продолжува да продава многу од своите брендови. Последниот потег ќе ја остави само продажбата на храна за бебиња.
„Иако не очекуваме да оствариме профит во земјата, кој било од тоа ќе биде донирано на хуманитарни организации“, се вели во соопштението на Nestle.
Меѓународните брендови како McDonald’s, L’Oreal, H&M и технолошкиот гигант Apple го суспендираа или ограничија своето работење во Русија.
Некои компании продолжуваат да произведуваат основни потреби во земјата, додека компаниите како M&S и Burger King велат дека договорите за франшиза го оневозможуваат затворањето на нивните продавници во Русија.
Во средата, рускиот претседател Владимир Путин објави дека земјата ќе почне да продава природен гас на „непријателските“ земји во рубљи. Разбирливо е дека овој потег е насочен кон поддршка на валутата.
ЕУ се потпира на Русија за 40% од нејзината потрошувачка на гас. Сепак, многу постоечки договори се преговарани во евра и не е јасно дали Русија може да ги промени.
Објавата на Путин ја доведе рубљата на највисоко ниво во последниве три недели.