Цените на храната се зголемија на светските пазари во јануари осми месец по ред, достигнувајќи го највисокото ниво од јули 2014 година, предводени од повисоки цени на житарките, шеќерот и растителните масла, објави во четвртокот Агенцијата за храна на Обединетите нации – ФАО.
Индексот на цени на основните прехранбени производи на ФАО се зголеми за 4,3 проценти во јануари од ревидираната вредност во декември, на просек од 113,3 поени, што е највисока вредност од јули 2014 година, соопшти ФАО.
Цените на житните култури скокнаа за 7,1 проценти на почетокот на годината во споредба со минатиот месец, предводени од 11,2% повисоки цени на пченката, потикнати од зголемените кинески набавки и проценките за неочекувано слабо производство и залихи во САД.
Дополнителна поддршка за цените на пченката беше обезбедена со привремено прекинување на регистрацијата на извозот во Аргентина.
Цените на пченицата исто така нагло пораснаа во јануари, за 6,8 проценти, поддржани од силната глобална побарувачка и очекувањата за намален извоз од Русија по најавеното двојно зголемување на извозните тарифи во март.
Во споредба со јануари минатата година, цените на житото пораснаа за 42,3 проценти.
Цените на шеќерот најмногу се зголемија во јануари, за 8,1 процент, што ја одразува загриженоста за влошување на изгледите за принос на шеќерна репка во Европската унија и Русија и шеќерна трска во Тајланд и сушата во Јужна Америка, што ќе ја зголеми побарувачката за увоз.
Индексот на цената на растителното масло порасна за 5,8 проценти и го достигна највисокото ниво од мај 2012 година, делумно поттикнат од намаленото производство на палмино масло во Индонезија и Малезија, делумно поради обилните дождови.
Цените на маслото од соја исто така се зголемија, како резултат на намалените капацитети за извоз и долгите протести во Аргентина.
Млекото и млечните производи пораснаа за 1,6 проценти, поттикнати од зголемениот кинески увоз пред новогодишните празници.
Цените на месото се зголемија за еден процент како резултат на птичјиот грип во Европа, што го намали извозот, така што Бразил увезуваше повеќе од други земји.