Црн рекорд во САД: Дефицит на државниот буџет од 1,9 билиони долари

од Nikola Popovski

Буџетскиот дефицит на САД се искачи на рекордни 1,9 билиони американски долари во првите седум месеци од тековната буџетска година, надуени со милијарди долари потрошени за помош, како резултат на пандемијата на коронавирус.

Во месечниот извештај за буџетот, Министерството за финансии во средата објави дека сегашниот дефицит е за 30,3 проценти поголем од дефицитот во исто време пред една година, што изнесуваше 1,48 билиони долари.

Големите загуби во двете години во најголем дел се должи на влијанието на пандемијата на коронавирусите, што ја поттикна владата да одобри милијарди долари за покривање на три рунди индивидуална помош, дополнителни бенефиции за невработеност и поддршка за малите бизниси.

Дефицитот за буџетската година што заврши на 30 септември, беше рекорден 3,1 билион долари, а многу економисти сметаат дека оваа година ќе го надмине тоа. Некои предвидуваат дефицит од 3,3 билиони долари.

Во април, дефицитот изнесуваше 225,6 милијарди долари, што е значително помалку отколку во април 2020 година, кога изнесуваше 738 милијарди долари. Ова подобрување го одразува фактот дека оваа година имало помалку исплати за олеснување и дека граѓаните морале да плаќаат даноци без одлагање, во вообичаениот априлски рок, додека минатата година сите плаќања на даноци беа одложени на почетокот на пандемијата.

Слични содржини