Дезинформациите не се одлика на нашето секојдневие и со случувањата во оваа држава, туку се нешто што се случува на глобално ниво, меѓутоа тоа не нè амнестира од одговорноста што ја имаме сите ние како креатори на информации, како некој што ги консумира тие информации како публика, вели Проф. д-р Марина Тунева, медиумски експер, во интервју за ЦИВИЛ Медиа.
„Проблемот за жал навистина постои, можеби е многу повеќе присутен на социјалните мрежи, меѓутоа ако се земе предвид, колку социјалните мрежи се извор на информации и за граѓаните и за дел од медиумите, или се почесто станува како практика во обидот да се дојде до некоја тема за која ќе се информира, тогаш несомнено штетите се големи. Тоа е проблем што треба систематски да се адресира со меѓусекторска соработка, со одговорност и внимание во однос на консумирањето на информациите“, вели Тунева.
Таа додава дека искуството покажува дека дезинформациите најчесто се присутни кога станува збор за сензитивни прашања, било да се на политичката сцена или со јавното здравје (здравство) итн.
„Видовме и на глобално ниво како лесно се шират дезинформациите и во нашата држава и како тие со голема брзина и леснотија се конзумира од граѓаните. Војната во Украина, земјотресите кои се случија во Турција и Сирија, корона кризата е евидентен пример како се ширеја дезинформации и тие навистина имаа влијание врз здравјето на населението и јавното здравство… Мора многу внимателно да се фокусираме кон решавањето на проблемот со дезинформациите. Не треба да остане само на дебати, конференции или истражувања, туку реално да се насочиме кон справувањето со овој проблем“, вели таа.