Водачот на каталонските сепаратисти Карлес Пучдемон беше уапсен во четвртокот од италијанската полиција на Сардинија, се вели во соопштението од неговата канцеларија.
Шпанија го обвини Пуџдемон, поранешен каталонски лидер, за бунт и помагање на референдумот за независност во 2017 година, што шпанските судови го оценија како нелегален.
Во март, Европскиот парламент го укина имунитетот на Пуџдемон, кој го уживаше како член од 2019. Оттогаш, Пуџдемон живее во самонаметнат егзил во Белгија, пренесува Ројтерс.
Неговата канцеларија вели дека Пуџдемон во четвртокот попладне отпатувал од Брисел до Алгеро, град во северозападна Сардинија, за да учествува на меѓународната изложба Адифолк и да се сретне со регионалниот лидер на Сардинија и нејзиниот правобранител.
„Кога пристигна на аеродромот Алгеро, го спречи италијанската гранична полиција. Утре ќе се појави пред судиите на апелациониот суд во Сасари, кои ќе одлучат дали ќе го ослободат или ќе го екстрадираат“, се вели во соопштението на канцеларијата.
Неговиот адвокат, Гонзало Боје, потврди на Твитер дека Пуџдемон е во притвор, додавајќи дека е уапсен врз основа на европска потерница од 14 октомври 2019 година, која беше „суспендирана според правниот императив – како што наведе Европскиот суд на правдата“.
Пуџдемон беше предмет на европска потерница издадена од Шпанија со која бараше негова екстрадиција поради неговата улога во обидот за независност.
Референдумот доведе до најголема политичка криза во Шпанија во последните децении, по што каталонскиот парламент еднострано прогласи независност во октомври 2017 година, што ја натера централната влада да наметне директна моќ од Мадрид, а властите почнаа да апсат лидери на сепаратистите.