Украинските војници тврдат дека викендов со автоматско оружје собориле вооружен дрон од кинеско производство на својата територија, пишува Си-Ен-Ен.
Станува збор за Mugin-5, комерцијален дрон направен од кинески производител со седиште во пристанишниот град Ксиамен, на источниот брег на Кина.
Некои технолошки блогери велат дека се познати како „Алибаба дронови“ бидејќи биле достапни за продажба до 15.000 долари на веб-страниците на кинескиот пазар.
Компанијата „Мугин Лимитед“ потврди за Си-Ен-Ен дека тоа е нивно летало, нарекувајќи го ова „несреќен инцидент“.
Тоа е најнов пример за употреба на цивилно беспилотно летало кое е накнадно опремено и вооружено, што е знак за брзо менување на моделите на војување.
„По должината на првите линии на фронтот, ние во основа правиме воздушно извидување цело време“, изјави Максим, 35-годишен ветеран од воздухопловните сили за Си-Ен-Ен.
Службата за безбедност на Украина (СБУ) изјави за Си-Ен-Ен дека нивните агенти со седиште на територијата под руска контрола ги предупредиле дека оттаму е лансиран дрон кој се упатил кон украинска цел.
СБУ потоа го вклучи алармот со воените единици со седиште во источна Украина, во близина на градот Славјанск.
Во саботата околу 2 часот по полноќ, борците на 111-та бригада на територијалната одбрана на Украина слушнале беспилотно летало и дури виделе како трепка светло на леталото.
„Од звукот, од сигналното светло, војниците пукаа во него и го соборија дронот“, рече Максим.
Тој додал дека дронот летал на многу мала височина – доволно блиску за да биде соборен со рачно оружје.
Во јануари, официјални лица во областа Луганск во источна Украина, контролирана од Русија, соопштија дека собориле „Мугин-5“ лансиран од украинските сили.
Украинските власти не го коментираа овој конкретен инцидент, но експертите рекоа дека има докази дека двете страни во конфликтот ја користат оваа технологија.
Бидејќи оружјето се развива во реално време на боиштата во Украина, цивилните компании кои стојат зад технологијата сега се обидуваат да најдат начини да спречат нивните производи да влезат во воениот синџир на снабдување.
„Ние не ја одобруваме употребата. Се обидуваме да го спречиме тоа“, изјави портпаролот на „Мугин Лимитед“ за Си-Ен-Ен.
Во претходна изјава објавена на својата веб-страница на 2 март, „Мугин Лимитед“ соопшти дека ја „осудува“ употребата на своите производи за време на војување и рече дека престанала да продава производи на Русија или Украина на почетокот на војната.