Унгарија би можела да се соочи со парични казни од ЕУ за непочитување на одлуката на Врховниот суд на европскиот блок за тоа како земјата постапува со бегалците и се справува со барањата за азил.
Европската комисија, извршното тело на блокот од 27 земји-членки, во денешното соопштение рече дека ќе го однесе случајот на Унгарија пред Европскиот суд на правдата за неуспехот да ја измени процедурата за азил во согласност со одлуката на судот, додека Будимпешта не започне согласно судската одлука.
Комисијата во соопштението наведе дека Унгарија не одговорила на неколку аспекти од пресудата.
„Унгарија особено не ги презеде мерките неопходни за да обезбеди ефикасен пристап кон постапката за азил. Унгарија исто така не ги разјасни условите поврзани со правото да остане на нејзина територија во случај на поднесување жалба во рамките на процедурата за азил“, се вели во соопштението на Европската комисија, пренесе „ABC News“, повикувајќи се на АП.
Иницијативата дојде откако Судот на ЕУ во декември пресуди дека Унгарија не го почитува правото на ЕУ со тоа што не дозволува луѓето да влезат во земјата без да им се даде право да аплицираат за азил и со приведување луѓе во „транзитни зони“ на нејзината граница со Србија .
Унгарскиот десничарски премиер Виктор Орбан е жесток противник на имиграцијата и ја претставува својата земја како „бедем“ против мигрантите од Блискиот Исток и Африка и како „заштитник“ на христијанството во Европа.
Орбан е исто така жесток критичар на ЕУ, а Унгарија се соочува со казни за кршење на основните вредности на ЕУ и владеењето на правото.
Околу осум милијарди долари од средствата на ЕУ за закрепнување од пандемијата на коронавирус наменети за Унгарија се блокирани поради недоволните заштитни мерки против корупција во планот за трошењето на земјата.
Европската комисија денеска побара од судот на ЕУ да и изрече казни на Унгарија во форма на вкупен износ и дневни казни. Таквата казна би била слична на санкциите што ЕУ неодамна ги воведе на Полска, сојузник на Унгарија, на која во октомври и беше наложено да плаќа по 1 милион евра дневно за кршење на вредностите на ЕУ во судството.