Употребата на антибиотици кај мали деца поврзани со алергии и астма

од Stefanija Kuzmanovska

Децата на возраст под две години кои примаат антибиотици имаат поголема веројатност да имаат проблеми со алергии, астма и други состојби на подоцнежна возраст, покажа новото американско истражување.

Бебињата и малите деца кои примаат единечна доза на антибиотици се повеќе склони кон астма, егзема, алергии на храна, целијачна болест, проблеми со телесната тежина и дебелина и нарушување на хиперактивноста со дефицит на внимание подоцна во детството, според студијата спроведена од „Mayo Clinic Proceedings“.

Повеќекратниот третман со антибиотици кај деца под две години е поврзан со неколку состојби, покажа истражувањето, а болестите се разликуваа во однос на полот на детето, возраста, видот на лекот, дозата и бројот на дози, пишува Си-Ен-Ен.

„Сакаме да нагласиме дека оваа студија покажува поврзаност, а не причина за овие состојби“, изјави авторот на студијата Нејтан Лебрасер, истражувач во Центарот за стареење на клиниката Мајо.

Тој додаде дека овие откритија нудат можност за идно истражување да се фокусира на утврдување на посигурни и побезбедни пристапи кон времето, дозата и видовите на антибиотици за деца од оваа возрасна група.

Истражувачите анализирале податоци од повеќе од 14.500 деца кои се дел од Проектот за епидемиологија во Рочестер, долгорочна студија која ги анализира медицинските досиеја на волонтери во Минесота и Висконсин.

Приближно 70 проценти од децата во студијата примиле барем еден антибиотик, а повеќето добиле повеќе антибиотици.

„Меѓу децата кои примаа еден или два антибиотици, само девојчињата имаа значително поголем ризик од развој на астма и целијачна болест“, напишале Лебрасер и неговиот тим.

Спротивно на тоа, приемот на три до четири антибиотици беше поврзан со поголема инциденца на астма, атопичен дерматитис и прекумерна тежина кај двата пола, АДХД, целијачна болест кај девојчињата и дебелина кај момчињата.

Слични содржини